كولر يوجه صدمة قوية لـ كهربا.. شوبير يكشف التفاصيل

كشف الإعلامي أحمد شوبير، كواليس جديدة في أزمة محمود عبدالمنعم كهربا، لاعب الفريق الأول لكرة القدم بالنادي الأهلي، مع السويسري مارسيل كولر، المدير الفني للفريق.

وقال شوبير في تصريحات إذاعية:" الناس هاجمتني امبارح لما انتقدت كهربا بعد موقفه في مباراة فاركو، بس بصراحة هفضل عند رأيي، ولازم لما المدرب يقولك حاجة تسمعها، وبعدين مش كولر ده اللي رجع كهربا للتألق والمشاركة، ووظفه في مركز رأس الحربة".

وتابع حارس مرمي الأهلي ومنتخب مصر الأسبق:" كولر بلغ كهربا إنه مش هيحضر المران الأخير قبل مباراة طلائع الجيش، واللاعب لما عرف محضرش التمرين من الأساس، واتوقع عليه عقوبة قاسية باستبعاده من مباراة الطلائع، وغرامة مالية كبيرة، ويا عالم هيكون موجود في المباريات المقبلة ولا لا، بس من الواضح إن العقوبة هتطول".

وشدد شوبير:" أنا موافقك إن كهربا لاعب مهم وأفاد الأهلي، لكن بكل تأكيد كان لابد إنه يشوف المشهد بالكامل بعد رحيل موديست، وفي ظل إصابة وسام أبو علي المتكررة، وكمان أزيدك من الشعر بيت، وهو إن كولر هيوظف طاهر محمد طاهر في مركز رأس الحربة في الفترة المقبلة".

وواصل شوبير:" كولر رجل يعشق النظام، وده من أبرز عوامل نجاحه ومعندوش كبير، ماذا استفاد كهربا من إنه ميتمرنش 10 دقايق بعد مباراة فاركو مع زملائه اللي مشاركوش ويقول عندي إصابة؟".

وأتم شوبير:" كهربا عنده عرض شفوي من نادي الخلود السعودي، والنادي قال لكهربا خلص نفسك مع الأهلي، وهتاخد مبلغ كذا، وناخدك إعارة سنة".