كهربا يكشف مفاجأة جديدة في غرامة الزمالك

أكد محمود عبدالمنعم كهربا، لاعب الفريق الأول لكرة القدم بالنادي الأهلي، أنه لم يكن ينوي تسديد الغرامة الموقعه عليه لصالح نادي الزمالك.

وقال كهربا في تصريحات تلفزيونية:" مكنتش هدفع غرامة نادي الزمالك نهائي لولا إن عندي طموحات كبيرة مع النادي الأهلي ده دفعني لسداد الغرامة".

وعن رفضه تسديد الغرامة حتى لا يتعاقد الزمالك مع صفقات قال:" الله أعلم ولكن الزمالك أكيد خزينة النادي بها أموال ولو مدفعتش الغرامة لحد نهاية مسيرتي كانت هتتلغي ولكن أنا دفعتها لأن عندي طموحات كبيرة إني أحقق كل البطولات مع الأهلي وأكون أسطورة أهلاوية".

وعن تزوير عقده مع الزمالك قال:"مضيت على بياض حبًا في نادي الزمالك عشان اطلع إعارة لاتحاد جدة السعودي، وملوا العقد في 2017 وحطوا فيه 4 سنين، واتوثق في 2018".

وأكمل:"المسؤول عن ده كابتن مجدي عبد الغني، وميعرفش حاجة عن حب وخير الأهلي عليه، ومصلحته أهم من حبه للأهلي، وأنا شاب ليه تظلمني وأنا من دور ولادك؟، ومصالح بينه وناس كتير، وجريت ورا حقي وده اللي خلص عليا، وشهد وبصم ومضى ضدي، ومواجهتوش لأن حقى عند ربنا، وكل يوم وطول العمر بقول حسبي الله ونعم الوكيل".

وأردف:"أنا بالإنجازات اللي وصلت لها دلوقتي أكيد أنا مش ظالم وربنا كرمني، وأنا عيل صغير بالنسبة له هرد عليه أقوله إيه؟، وعمره ما هيعرف يرد عليا بحاجة".

وأتم كهربا تصريحاته قائلا:" اتظلمت ظلم وحش أوي، وربنا جاب ليا حقي الحمد لله، وأحمد مجاهد - رئيس اللجنة الثلاثية التي أدارت اتحاد الكرة سابقا - في نفس مركب مجدي عبد الغني، وطول حياتي مشتمتش الزمالك، وبحترمه جدًا، ولازم يعرفوا إني مظلوم، أنا دخلت للزمالك مبلغ كبير في الإعارات حوالي 84 مليون في الوقت ده".