متعب : هواياتي "بره الملعب " الصيد ومشاهدة مباريات التنس

أكد عماد متعب نجم وأسطورة الأهلي في تصريحات لبرنامج "بره الملعب " مع مها السنباطي على أون سبورت إف إم إن أهم هواية له بره الملعب هي الصيد والذي تحول بالنسبة لي لفلسفة مش مجرد هواية، بدايتي مع الصيد كانت مع والدي واعمامي يحيى ومصطفى كانوا بيحبوا الصيد جدا وياخدوني معهم وهما رايحين يصطادوا واتعلمت وارتبطت وبعد ما بقيت في الأهلي حاولت أخذ بعض زمايلي في الفريق لكن ما استحملوش بصراحة، لأن الصيد صبر وعالم أخر له علاقة بمواسم والقمر، فهناك سمك صيده في الظلام فقط، وفي أنواع أخرى صيدها بيكون مع طلوع القمر مثلا، وفي صيد من على وش المياة ونوع الأرض بيفرق وحاجات كتير، لكن اللي بييجي معايا من زملائي في الملعب كانوا متخيلين الموضوع ترفيه فقط لكن بالنسبة لي الصيد دخل في سكة احتراف، رحلات وأيام في البحر وأكثر رحلة كانت 3 أيام مثلا وأنا بلعب كنت بعمل كده في الاجازات اللي كنا بناخدها ودي كانت قليلة جدا، وبعد ما بطلت برضه مقدرش أقعد أكتر من كده عشان البيت والشغل والبنات، وممكن أطلع واقعد الفترة دي في البحر وما اصطادش حاجة وفي أيام بيكون الكمية كبيرة، مع العلم إني مش أكيل سمك، فاصحابي بياخدوه أو في ناس بتكون مستنياه.

متعب : هواياتي "بره الملعب " الصيد ومشاهدة مباريات التنس

وأضاف متعب: حاولت أخد يارا نعوم زوجتي وأحببها في فكرة الصيد وحصل في 3 رحلات لكن للأسف حظها بيكون سيئ جدا، وأول مرة كنا في مركب في الغردقة والمركب فصلت كهربا فكان عذاب مفيش أكل ولا تكييف وكنا في الصيف، والمرة التانية جابت أصحابها وحصل نوة والبحر قلب، في المرة الثالثة جالها تسمم وخرجت من البحر رجعتها على الأوتيل وطلعت مكمل الرحلة عادي بعد اطمنت إنها بخير فعشان كده موضوع الصيد ده قفلت منه بشكل نهائي.

واختتم متعب : أن الصيد علمني الصبر والهدوء والرضا، لأن ممكن 3 أشخاص ممكن يبقوا قاعدين يصطادوا جنب بعض وواحد أو اتنين هما اللي يطلعوا سمك والتالت ما يطلعش رغم انها نفس المنطقة ونفس المية ونفس الأرضية، فاتعلمت إني لو مليش رزق في حاجة مش هاخدها، وفي أوقات كنت بطلع سمكة 28 كيلوا في أخر نص دقيقة قبل ما أقوم 90 بلس حتى في السمك.